防止兒童近視加深的最有效方法

作為一個有返緊學小朋友嘅眼科醫生媽咪,係街度見到小學生甚至乎係K3學生細細個已經帶住厚厚嘅眼鏡,每次見到心中都會於心不忍。我自己現在都有600度近視,但相比之下我小五時才開始需要戴眼鏡。

香港小朋友患近視嘅比率於全球排名頗高,香港六歲兒童中患有近視的比例達13%。愛錫自己仔女嘅父母都會想盡辦法希望阻止小朋友的近視加深。近視加深除了需要配戴眼鏡,唔方便之外還有什麼影響呢?

一般來說600度以上的近視我們稱為深近視。1000度以上則已屬病態性近視。

有深近視的人患上視網膜脫落、白內障、青光眼及黃斑點病變等眼疾的風險比正常人為高。近視600度以上的人患上視網膜脫落的機率就高達3.2%。

作為關心子女的父母,可以如何幫助子女防止近視加深呢? 

作為父母當然希望仔女身體健康,培養良好習慣,多做運動,我自己就十分奉行戶外的親子活動。但其實你知唔知道戶外活動都可以減慢近視加深呢?

政府宣傳健康資訊嘅網頁都提倡每日兩小時嘅戶外活動。香港小朋友出名功課多,我都知道好難叫香港嘅小朋友每日休息兩個鐘,出嚟呼吸新鮮空氣,但我會建議父母至少帶小朋友到公園玩,起碼一星期兩次,除咗鍛鍊四肢,亦能夠促進眼部健康。

另外,無論大朋友或者小朋友,每進行三十分鐘近距離工作,特別係睇電話或者平板電腦之後,都應該休息至少兩分鐘,當然閱讀時也要注意適當嘅光度、距離同埋字體大小。